G.nr. 120 b.nr. 1 Husom Nordre (Nordistugu Husom)
Etter at gardane vart fløtt frå den første byggestaden på austsida av Husbekken like ovafor den nåverande riksvegen, vart Nordre Husom bygd opp att i lia på vestsida av bekken og noko høgre oppe enn Søre Husom. Tida for delinga av den første, opprinnelege Husomgarden kan ein kanskje sette til omlag 1645-50.
Første brukaren må vera Eirik Siverson, som truleg er den Erik som ved krøttertellinga i 1657 har 1 hest, 4 storfe, 4 geit og 4 sau. Far hans var Sjugurd (Siver) Oleson Nørstegard. I matrikkelen 1668 står det: Jorddrotten er kapt. Reichwein, skylder 1 pund smør, brukaren er Erich Siffuersen, som har 1 skinn, sår 1/2.td. korn, før 14 storfe og 2 hestar, betaler skatt 3 ort, i tiende 1/2.settung, i leding 1 skilling og for ei kvern 8 skilling. Det er skog til husbruk og god hamn. Enga er «temmelig».
Kona til Eirik var Marit Halvorsdatter, som døydde i 1677. Eirik var død før. I skiftet 7. november 1677 var eiga berre 57 rd. 3 ort. Dette ser nokså rart ut, når ein minnes at det i 1668 var 2 hestar og 14 storfe.
----------
Eirik Siverson, født omlag 1604, død før 1677, gift omlag 1655 med Marit Halvorsdatter Dalen (134-6) født (1626), død 1677. Eiriks bror Mikkel sjå Husom Søndre (118-1) og halvbroren Hans sjå Hjerkinn Nordre.
Barn:
1. Hans, født omlag 1655, lagnad ukjent.
2. Bård, født 1656, neste brukar.
3. Haldog, født omlag 1660, lagnad ukjent.
4. Ragnhild, født omlag 1665, sjå Lohn (130-1). |